Educadora

Cristina Pato é unha gaiteira galega, pianista clásica, escritora e educadora apaixonada. Aclamada como “unha virtuosa explosión de enerxía” por The New York Times, a súa vida profesional está dedicada á interpretación e á docencia que explora o rol das artes e das ciencias na sociedade. Bio completa


Ademais do seu traballo como músico, Cristina traballa como Asesora de Educación de Silkroad, a organización fundada polo violonchelista Yo-Yo Ma, colaborando estreitamente na planificación de residencias e actividades educativas, entre elas a colaboración multianual coa Universidade de Harvard. Ten colaborado coma poñente, mentora e profesora en varios proxectos que Silkroad desenvolveu coa Escola de Negocios de Harvard e a Escola de Educación de Harvard, incluíndo The Arts and Passion-Driven Learning Summer Institute para artistas e educadores. 

En 2012 Cristina escribe “My Lethe Story: o río do esquecemento, unha peza narrativa de música de cámara encargada por Silkroad e estreada na Universidade de Harvard. A peza combina a paixón de Cristina pola neurociencia e a historia persoal da perda de memoria da súa nai. Con esta obra, Cristina desenvolveu un novo camiño para entender o poder de combinar artes e ciencias nas institucións académicas. En 2016 comezou unha colaboración continuada coa Universidade de California, Santa Barbara coa súa clase piloto: “Memory: An Interdisciplinary Exploration” cocreada e coimpartida por Cristina Pato, o profesor Ken Kosik (neurociencia), a profesora Kim Yasuda (arte espacial) e a profesora Mary Hancock (antropoloxía).

En 2017 foi nomeada Blodgett Distinguished Artist in Residence na Universidade de Harvard (Departamento de Música) e no curso 2019-2020 ocupou a Cátedra de Cultura e Civilización Española no King Juan Carlos Center da Universidade de Nova York (NYU).

Cristina posúe un Doutorado en Artes Musicais pola Rutgers University (EUA), os títulos superiores de Piano, Teoría da Música e Música de Cámara polo Conservatorio de Música do Liceu, e un Master en Artes Dixitais da Universitat Pompeu Fabra. Cristina está preparando un doutoramento en Estudos Culturais na Universidade de Santiago de Compostela. 

Unha clase piloto co-creada por Cristina Pato, Ken Kosik, Kim Yasuda e Mary Hancock para a UCSB. Patrocinada por John Arnhold

Cátedra de Cultura e Civilización Española 2019-2020 no King Juan Carlos Center da Universidade de Nova York (NYU).

Co-directora do Arts and Passion Driven Learning Institute de Harvard University. Un proxecto de SilkRoad e a Harvard Graduate School of Education codirixido por Steve Seidel

Cristina é tamén produtora e directora de eventos multidisciplinares, incluíndo o seu propio festival Galician Connection, e producións para outros artistas como o Yo-Yo Ma’s Bach Project.