Esenciais 20/50 é un laboratorio de creación e pensamento que xira ao redor da arte, a sociedade e a idade. O obxectivo desta iniciativa, creada por Cristina Pato e Xaime Fandiño en colaboración con Cunde e a Oficina Galega de Outros Asuntos do Movemento, é que os participantes reflexionen e aprendan sobre os estereotipos e os diferentes xeitos de envellecer.

A iniciativa pretende crear un espazo para o diálogo, a reflexión e a creación integrando a persoas de diferentes idades. Con este foco interxeracional, nace a súa programación, centrada nunha serie de obradoiros interdisciplinares que acollerán participantes de diferentes xeracións, oficios e vidas creando con eles espazos de interacción arredor de procesos artístico-pedagóxicos vivenciais.

O resultado destes obradoiros reflíctese no evento cume de “Esenciais 20/50”: unha mostra escénica que conta coa colaboración dun equipo de artistas que inclúe a Marina Oural e Ugia Pedreira (Oficina galega de outros asuntos do movemento), a poeta Eva Veiga, a improvisadora oral e docente Alba María, a improvisadora e compositora Chefa Alonso, a cantante e compositora Wöyza, e o grupo interxeracional Deteriorados. Os protagonistas desta obra son as historias de vida e experiencias dun grupo de persoas que están a afrontar o envellecemento de xeitos diferentes, xerando un espazo común entre público e participantes da mostra.

Esenciais 20/50 nace coma unha resposta cultural ao fenómeno do idadismo, un termo acuñado polo xerontólogo norteamericano Robert N. Butler que o definía coma «a discriminación sistemática contra as persoas pola súa idade», unha discriminación a nivel social e institucional, que se manifestou con máis forza que nunca durante a pandemia do coronavirus.

No ano 2019, o periódico El País publicaba unha reportaxe na que definía a Ourense coma “o epicentro da Europa avellentada”. Nese artigo citábase ao profesor da Universidade de Vigo, Alberto Vaquero, dicindo que “Ourense ten hoxe os perfís demográficos da UE en 2050”. E desa idea, do feito de que a provincia vai por diante nesta histórica carreira demográfica, nace o nome deste proxecto, Esenciais 20/50, cuxa intención é crear un espazo para o diálogo, a reflexión e a creación cun sector da sociedade do que aínda temos tanto que aprender.